lifedays-seite - moment in time

Literarische Epochen

Verzeichnis der literarischen Epochen
Renaissance

Der Babst mit dem Kind

1.
Hört wie in engelande
Ein wunderschöne junckfraw was,
Als ich in der cronica las,
Gen der in lieb entprande
Ein doctor mit pegiren.
Der sie in mannes kleide
Mit im hinfueret gen athen
Auf die hochschuel solt ir versten
Al da sie alle peide
Thetten fleysig studiren.

Das weib wart wolgeleret
In allen künsten sie drefflich zw nome.
Der doctor hochgeeret
Zog mit seiner liebhaberin gen rome;
In mannes cleid sie vnerkant
Alle doctores vbervant,
Ir preis das wart gemeret,

2.
Das ir alle prelatten
Sprachen lob, er aus rechter gunst;
Durch irr sinschicklikeit vnd kunst
Wart sie nach diesen taten
Bl. 63'
Zw einem cardinale.

Als nun leo der firde
Starb, da wart sie zw babst erwelt,
Johannes der achte geczelt;
Also das weib regirde
Das bastum nach der wale.
Der doctor vorgesprochen
Wont stet pey dem babst seinem schönen weibe.
Kurczlich ir freüd wart prochen,
Der heilig babst, der wart schwanger von leibe.
Sein leib wuchs ser gros mit der zeit,
Doch verparg er sein schwangerheit
Auf neunundreissig wochen.

3.
Vnd als der babst mit prangen
Mit all seinen cardinelen
Wollt in sant johans kirchen gen,
Wart er mit we umfangen
Vnter des himels wolcke.

Vnd da ein kint gepare
Jdoch starb er schmerczlich daran
Alda erst sein weiplich persan
Wart also offenware
Allem romischen volcke.

Also wurden geplende
All cardinel vnd romische prelatten
Durch weiplich list pehende,
Die sich zw lecz veriet mit offen tatten.
Bl. 64
Also wo noch heimlich schalckheit
Verporgen pleibet lange Zeit,
Wirt sie offen am ende.

Anno salutis 1532 gedicht am 29 tag marcj

oben

Das Walt got

Jn der morgenweis Hans Sachsens
Die nachtigal 3 lieder

Wacht auf wacht auf, es taget
Ein nachtigal die waget
ir stim mit suessem hal.
ir thon durchclinget perg vnd thal
Die morgenrot her zicket
Der leo sich peclaget
Wie geren er verjaget
die lieplich nachtigal
Der liechte man ist worden fal
Die helle sun her plicket
Das wilde schwein schreit waffe
Die Nachtigal zw straffe
Der poch hunt kacz mit im
marren stet dar wider mit grim
Vnd das schlangen geczichte
Wisplet vnd wider fichte
Die wolff hewlen al gleich
Wollen das die nachtigal weich
Furchten des tages lichte
Jdoch sie schweiget nichte
Sunder singet fröleich
Der tag get auf gar frewdenreich
Secht die irenden schaffe
Erwacht sint von dem schlaffe
Von der Nachtigal stim
Des manes schein sie achten nim
Der sie lang hat gedricket

Die morgenrot deut freye
gesecz vnd propheczeye
Die sune ist Cristus
Der tag das Ewangeli sus
Die nach pedewt die sunde
Wer die nachtigal seye
Der vns den tag ausschreye
Jst doctor Martinus
Von wittenwerg Her lutherus
nun hört was er verkunde
Jn sunt sey wir geporen
Von natur kint des zoren
nach inhalt des gesecz
pis das wort gottes vns zw letz
Das Evangelisch liechte
genad vnd frid versprichte
Cristus hab vns erlost
Von sunt dot deuffel hele rost
Solch verheyssung aufrichte
Drawen vnd zwfersichte
Auf Cristum vnsren drost
Dan wirt vns gottes geist genost
Dan sey wir awserkoren
Der man ist finster woren
Pedewt das pebstlich netz
Seine gepot vnd applas schetz
Jn der schrift vngegrunde

Von den vns luther seitte
Das sie zur selikkeitte
Sint weder nutz noch not
nur der vertraw in Cristi dot
Seliget vns alsamen
Der leb den Babst pedeitte
Der cristlich ler verpeitte
pey verdamung doch hot
Kein mensch gewalt sunder nur got
Den menschen zw ferdamen
Swein pock hunt kacz die thire
pedewtten vns die vire
Eck emser lemp murner
Kempfen wider die warheit ser
Das schlangen Zicht ser prande
pfaffen munich im lande
Etlich hochschuel vnd stift
Das wolff hewllen die pischoff drift
Disses folck alles sande
Den luther keczer nande
Wie wol sie in mit schrift
Nie vberwunden han hie prift
Kein stuck, darin er irre
Des sint erwachet wire
Durch Ewangelisch ler
Von den menschen gepotten schwer
got sey mit vns sprecht amen

gedicht zw Nurmberg im .1523. jar

oben